APASI ROUN, APASI TADTARU !

APASI ROUN, APASI TADTARU

 

             Apasi roun, apasi tadtaru? Panandaatan diti norongou ku mantad lungkitas Boros Kadazandusun, Gundohing Jouseph Yabai. Otutunan nogi isio do Tatak Barambang maya ponuatan dau id Utusan Borneo. Noimayaan tomod oku nokorongou do panandaatan diti. Id pomusarahan ku sondii, panandaatan diti mogowit rati ii aralom tomod. Id koposion tokou sasangadau, opikito om opirongou dati do tumalup no boros tinaru tokou id mato pomogunan. Nung ingaa boros, nunu po rati do iso’ tinaru?

             

         Noimayaan oku panandaatan diti tu’ mogowit rati ii aralom. Nung aiso  roun ii poimpasi, kokito nanu’ yati do kolibambang ii ongolumis o wotik om koinanon do baino? Sisimbar nopo nga, amu. Sundung tu ingkaa, Kinoimayaan ku nopo nga okon ko kokomoi do kolibambang. Panandaatan  diti nogi kokomoi do boros tinaru tokou, Kadazan om Dusun. Ii pohontolon ku nopo id ponuatan diti nga kokomoi do koponudukan mongingia, molohing, tobpinai om tulun ginumuan kumaa tanganak tinaru tokou do baino.

            

              Roun nopo dilo’ nga sabaagi ii monunuduk om ilo’ tadtaru nopo nga ii tudukan toi ko’ ii sakag wagu. Nung aiso monuduk do minsingilo om mintutun do tinaru tokou, aiso no koilo do momoros om kotutun nunu nopo kokomoi do tinaru diti. Ilo no pogi nokuro tu’ ii poinmiau o roun ngoyon dii tadtaru iono’ mooi do apasi yau. Iondi nogi nondo iti tinaru tokou. Mooi do apasi om ogompi, oponsol no daa kopio haro mongia’ om mongodsuur tulun tinaru tokou. Iri no pogi nokuro tu’ mangan po’ia’o boros om tinaru tokou id sikul taang tosiriba gisom id poginabasan takawas.

 

       

            Sundung tu’ ingkaa, id kasarahan ku nopo nga amu osonong ii roun kinoyonon dii tadtaru do baino. Haro no piipiro roun ii osonong. Gumuli kawagu rati dilo’ roun om tadtaru, amu osonong ii monunuduk. Kipomusarahan oku do ionti tu’ nopurimanan ku sondii solinaid minsingilo om mintutun tinaru ku sondii diti. Oruol, noromuk, noruta’, nopigis om notonu’ ginawo ku soira kosorou do ahal diti. Amu oku kaanu do poposuang hiti id ginawo ku do ii mongingia’ sondii amu monuduk om mimboros id boros tinaru sondii kumaa tangaanak, tulun ginumuan om tobpinai dau. Nung kotilombus iti, okon-okon nondo ii minsingilo nogi miagal ko’ ii mokiikinobos id Institut Pendidikan Guru ( IPG ). Ahal diti nogi nondo nga miagal dii kolibambang tu’ iri-iri nondo kosilihon gisom do sogigisom.

Oputan kawagu id kopongia’an om maan paagalo koposion dilo kolibambang, oponsol no daa kopio do tamangan om tudukan kopio dii mongingia’ ii susumikul lobi-lobi po kumaa ii mokiikinobos sumiliu do mongingia. Miagal nogi dii roun, soira koumbagal no timpu dii tadtaru id suang, sumoliwan no nondo sumiliu do kolibambang ii olumis om royohon do tulun. Iondi nogi daa nuon dati om tulun ginumuan do songulun mongingia. Soira kalabus mantad id poginabasan, miagal po nondo dii kolibambang o kinosonongo om noponu do koilaan mantad ogumu gana.

Sabaagi pongolingkuman, panandaatan diti nakapanahak do iso pomusarahan ii okuri tulun do opusou. Id koposion diti, milo dati paagalon do nunu nopo id suang talun. Sabaagi poomitanan nopo nga iti roun om tadtaru maan paagalo dilo mongingia’ om susumikul. ‘ APASI ROUN, APASI TADTARU !! ‘